ف قلب الليل
وعزف الصمت متهادى كموج النيل
ف قلب الليل
وبرد الخوف بيتكتك سنان الخيل
ومافى حد ف الشارع
سوى مهر اتربط جازع
ف شجرة سنط وأنا والصمت
وبرد الليل وخوف الليل
وصهل المهر لم أفهم أخوف منى أمتعاجب
سألت المهر لم يفهم كلام منى ولا جاوب
وكان ف عينيه برئ منى
كإنه كان بيسألنى وقفت انظرله ينظرلى
وانظرله وينظرلى
ولما صار كماخلى
فتحنا أبواب حكاوينا وتهنا فى أغانينا
ف برد الليل وخوف الليل وحزن الليل
وكان فى جيده قيد جارحه
وقيد فى جيدى مالمحه
لكن حسه أكيد حسه
وفجأه لقينا احلامنا وصهل الفجر ف عيوننا
مسكت قيوده فكيتها صهل بمعانى حسيتها
وصار يجرى وينسانى وأنا باجرى ف طريق تانى
ف برد الليل وخوف الليل وحزن الليل
وبعد كتير
ف ليل تانى لقيته لوحده من تانى
فى جيده يقيده قيد تانى
صهل تانى
ماردتشى
وباقى لوحدى أنا بامشى
ف برد الليل وخوف الليل وحزن الليل
0 comments:
إرسال تعليق